ملخص نهاية كفر دلهاب الحلقة الاخيرة

نهايه عظيمه لمسلسل عظيم , اخر 5 دقايق فى المسلسل كان فيهم الخلاصه كلها ..

- الطبيب لما شاف امه بتموت وبتتظلم كان قدامه طريقين يجيب بيهم حقها ياأما يتوكل على الله ويجيب حقها بالعدل , يااما يسلم نفسه للشيطان وهو يجبله برده حقه بس بالظلم , الطبيب طول المسلسل كان عايش دور المحترم البريئ اللى بيداوى الناس بس ده من برا لكن من جوا كان شيطان هو اللى سببلهم المرض اصلا وجابلهم العلا زى ماربنا قال فى القران " ومن الناس من يعجبك قوله في الحياة الدنيا ويشهد الله على ما في قلبه وهو ألد الخصام "

- فى اخر المسلسل قال انه الحصاد مسيره يجى , اخته سألته حصاد ايه ما العدل اتحقق , راح ضحك وقالها عدل ؟! وده معناه انه الشيطان كان ليه غايتين الغايه الاولى انه يجبله حقه ويفرحه بس الغايه التانيه انه يكون ده على حساب الناس بالظلم , هى دى وظيفه الشيطان يبسطك ويريحك بس على حساب ناس تانيه مالهاش ذنب .

- سألته طب واللى ظلم ؟! , قالها ماله اللى ظلم انا مش محتاجله فى حاجة بالعكس يموت على ظلمه اضمن المظلوم هو اللى خطر عليا هو ده مربط الفرس لما المظلوم ينسى ربه وينسى انه يتكل عليه ويفتكر انه دراعه هو اللى هيجبله حقه مش اراده ربه وان النار اللى جواه لازم تحرق الكل , وده معناه انه الشيطان مش مركز نهائى مع الظالم والحاكم الظالم والطغاه لانه عارف نهايتهم ايه , هو عايز المظلوم عايز يمتلكه ويجبله حقه بالظلم وبالكفر بعيد عن عدل ربنا وساعتها المظلوم يبقا ظالم والدايرة تكمل , دايرة ايه ؟! , دايرة الدم والسواد ..

- سألته اخته بستغراب انت ازاى شيطان وبتقول ان شاء الله دايما , قالها لانه ماحدش يقدر يخرج عن مشيئه الله بس تقدر تخرج عن طاعته اه وتعصاه انما مشيئه ربنا لا , قالتله طب والعدل اللى انت عايز تعمله , قالها عدل ايه ؟! مافيش حد من اللى اتقتلوا اتعملوا محاكمه عادله بالعكس كله اتظلم واتاخد فى الرجلين , قالها كمان مش قولتلك هما اللى بيقونى وبيسقطوا وانا دايما الكسبان وقام مصرخ وقالها " انا الحقيقه انا احسن منهم انا اللى هفضل عايش طول ما الارض بتتروى بدم الظلمه والمظلومين والمقصود بيه " الشيطان "

- فى النهايه الطبيب " الشيطان " طلب من اخته انها تختار يااما تمشى فى سكته ياما لا وقالها انا ماعرفش اختيارك بس كل اللى اعرفه انك مسؤله عن اختيارك , زى ماربنا قال فى القران للشيطان " إن عبادي ليس لك عليهم سلطان إلا من اتبعك من الغاوين "

هو ده قصه المسلسل انه الشيطان هيجبلك حقك وهيبسطك بس على حساب غيرك لو كنت مظلوم هيجبلك حقك بالظلم وهيظلم غيرك وده كله كفر بعيد عن عدل ربنا , وان الشيطان مالوش سلطان عليك انت اللى بأيدك تخليه تحت امرك وبأيدك تبعده , هى دى الحياه ياتعيش بما يرضى الله وتتوكل عليه وهو هيجبلك حقك يا تكفر بالله وتجيب حقك عن طريق الشيطان بس هيجبهولك بالظلم على حساب ناس مالهاش ذنب ..

ده اللى انا قدرت افسره من نهايه المسلسل , نهايه عظيمه لمسلسل عظيم
" الدم بيجيب دم , والظلم بيجيب خراب "